مواقف ومش طرائف 1

اول موقف ده عمري ما هنساه ....في يوم صحيت متاخر وكان عليا محاضرة
والطبيعي عندي اني لما اصحي متاخر مش بروح الكليه خالص واكمل نوم
بس المرة دي كانت اخر محاضرة في الترم يعني لازم اروح فقمت لبست بسرعه وكده
وفي الوقت ده كنا مشغولين في المشاريع فكنت لازم اخد معايا الكمبيوتر
المهم نزلت ركبت تاكسي عشان الحق اي حاجه المحاضرة كانت الساعه 9
وانا تقريبا وصلت علي 10 ونص كده كنت بنام وانا ماشيه عشان كنت سهرانه اليوم اللي قبله
قلت انا هخبط وخلاص ايه هتهزق يعني اهي تهزيقه تفوت ولا حد يموت
المهم
خبطت وفتحت الباب وبعدين الدكتور كان عمال يتكلم وانا اصلا مش مركزه معاه خالص
مش سمعاه تقريبا
بيقولي انتي صحيتي متاخر .... ليه كده ...حاجه زي كده يعني وانا ولا هنا
استنيت لما خلص الكلام وقلتله يعني ادخل ...تقريبا راح شاور بإيده كده يعني ادخلي
وبعدين لقيت الدفعه بتضحك عليا
انا بقي مش عارفه هو الدكتور كان بيقول ايه بالظبط
كل ما افتكر الموقف ده اعد اضحك علي نفسي
واحده نعسانه وجايه متاخر
مش كان اكرملي اعد في بيتنا
واصلا مكنش باقي من المحاضرة كتير هي كانت نص ساعه
يلا حصل خير

وده بقي موقف عجيب جدا !!
كنت في رحله انا وصحابي .. كان من برنامج الرحلة القلعه طبعا ازاي اروح القلعه
ومسلمش علي ريا وسكينه ....
المهم رحنا نسلم عليهم .. واحنا بنتفرج كده كان في آلة تزوير فلوس
وكان في راجل بيتفرج ... انا مكنتش عارفه هي ايه دي وبعدين كنت بسأل واحده صحبتي ايه دي
لقيت الراجل ده بيقولي آله تزوير "الله هو انا سألتك " قلتله شكرا ومشيت
المصيبه اني مكنتش فاهمه اصلا هو بيقول ايه
وبعدين سبنا آلة التزوير ورحنا نتفرج علي الحجات التانيه
لقيت الراجل جاي ورانا ... وبعدين كل ما اعلق علي حاجه الاقيه راح اتكلم عليها
انا استغربت قوي !! .. ده مش معقول بيشتغل هنا يعني وخصوصا ان حد كبير يعني في سن بابا تقريبا
وشكله مش من مصر
وبعد شويه كده لقيته جاي بيقولي انا خضر من السودان ...
عشان واحد كبير بقي مجاش ف بالي انه ممكن يكون قصده اي حاجه مش تمام
قلتله اهلا وسهلا .. وكان عاوز يتعرف وكده برضه عشان حد كبير فلازم احترمه
ومينفعش اكون قليلة الزوق ومش من مصر كمان ... فقلتله اسمي ومن مصر
وحضرتك عاوز حاجه ؟؟؟؟ وبعدين رحت ماشيه .... بيني وبينكم كده حسيت انه مش تمام
وكل ده صحابي مكنوش معايا " وانا ف دماغي ادعي عليكو بأيه كده تسبوني لوحدي "
وحكتلهم اللي حصل هما برضه قالو انهم كانو حاسين انه مش مظبوط
طلعنا برا خالص وكنا بنتصور وكده لقنياه واقف مستني وعمال يبص بصات غريبه
رحنا قلنا نمشي من هنا خالص احسن " هو ده اللي اخدنا من ريا وسكينه "
المهم
لقنياه جاي ورنا .. لا بقي ده مستقصدنا ... كنا هنقول لحارس الامن بس كان بعيد
قلتلهم انتو يا عيال يلا نجري ... "كانت اول مرة تحصلي حاجه زي كده واجري كده بس كانت حاجه جامده "
وجرينا لحد ما قربنا من حارس الامن بصينا ورنا ملقناش حد .... قلنا الحمدالله
بعد كده مكناش قادرين نمسك نفسنا من الضحك من اللي حصل ده
لما روحت البيت اول ما وصلت من غير ما اغير هدومي ولا اي حاجه قعدت احكي اللي حصل لماما وبابا
وبعدين بابا فضل مسكهالي تقريبا شهر كل شويه يقولي خضر من السودان ويضحك ويتريق عليا
طب كنتي شوفي حد تاني ملقتيش غير من السودان وهزار وتريقه من دي بقي
مش بقولكم الموقف ده عشان تتريقو انتو كمان عشان تبقو تاخدو بالكم
بجد مفيش حد بيتعلم حاجه ببلاش
يعني بسبب الناس دي مش لازم عشان حد كبير نحترمه.. عكس الكلام اللي كنا متربين عليه
وكفايه كده بقي المرة دي